Mar 21, 2012

သူ့ပုံတူ သူပြန်ဆွဲထားတဲ့ ကဗျာ

ကျွန်တော်က ..
အရောင်တစ်ခုခုရဲ့ ဖမ်းစားမှုနဲ့
ကဗျာတွေခင်းထားတဲ့ ပထ၀ီကို နမ်းပြီး..
ကြီးပြင်းလာတဲ့ ကောင်။

ရင်တစ်ချက် လှပ်ကနဲ ဆို
ရွှေမျက်ရည် စိုလက်လက် တွေက
ကဗျာ ပေါ် ငိုချ...
နှလုံးတစ်ဝိုက် လှိုက်ကနဲဆို
အသိုင်းအ၀ိုင်းတွေ အားလုံးရဲ့ အပြင်ထွက်ပြီး..
ကဗျာပေါ် ဟက်ဟက်ပက်ပက် ရယ်ချတတ်တယ်။

အနိမ့် အမြင့် ရစ်သမ်..
ခံစားချက် ချို ခါး
အလှဆုံးပန်းလေးတွေနဲ့..
ရုပ်အဆိုးဆုံး ကိလေသာတွေ..
ကဗျာမှာ ရှိတယ်..
ကဗျာတွေ ဖတ်တယ်..
ကဗျာတွေ ရေးတယ်...
ကျွန်တော်ဟာ..  ကဗျာတိုင်းအပေါ်မှာ
မျက်နှာများတယ်.။

ရုပ်နာမ်နှစ်ပါး ဓါတ်လေးပါးနဲ့
သုံးဆယ့်တစ်ဘုံ သားတွေ ရှိတဲ့...
ဒုတိယ လောက ဟာ... ကဗျာဖြစ်တယ်...
ဒါ့ကြောင့် ကျွန်တော်နဲ့ ကဗျာဟာ..
ကမ္ဘာပေါ်မှာ သံသရာ လည်ဖြစ်ကြတယ်။

ကဗျာ... ဆိုတာက...
ကျွန်တော် ပြန်အလည်ချင်ဆုံး မွေးရပ်ဇာတိလို
ဆွေးမြေ့ဖွယ်..
ကျွန်တော် မနက်တိုင်းတောင့်တတဲ့ လက်ဖက်ရည်လို
နိစ္စဓူဝ အာဟာရ
ကျွန်တော် အသည်းကွဲဖူးတဲ့ ရှစ်မျက်နှာဘုရားက အင်္ဂါထောင့်လို
တစ်ဆစ်ဆစ် နာကျင်နေတဲ့ ဒဏ်ရာ..။

ည... ည ကျွန်တော် အိပ်ခါနီးတိုင်း..
အမွှေးနံ့ နဲ့ မြှူဆွယ်...
အသံစူးစူး... ရူးသွပ် ဂီတနဲ့ သိမ်းသွင်းဆွဲဆောင်
ကဗျာဟာ... ကျွန်တော် ခေါင်းရင်းမှာ...
မကျွတ်မလွတ်သေးတဲ့ .. နာနာဘာဝ တစ်ကောင်လဲ ဖြစ်တယ်.။

သိပ်ကို ချစ်ဖို့ကောင်းတဲ့
ချစ်သူ သေးသေးလေး တစ်ယောက်
ကောက်ရထားသလို....
ကဗျာထားရာ နေ ကဗျာ စေရာသွား..
မာနတွေ အတ္တတွေ ဆိုတာ
ကဗျာစိတ်နဲ့ပဲ.. ဆုံးပါးသွားခဲ့တာ..
ကြာ ပေါ့ လေ..။    ။


လက်ဝဲ
ကမ္ဘာ့ကဗျာနေ့ (၂၁.၃.၂၀၁၂)

6 comments:

  1. ကဗျာလေးအတွက် ကမ္ဘာ့ကဗျာနေ့အမှတ်တရနေ့အတွက် ဂုဏ်ယူပါတယ်။
    ကဗျာကဝေတောမှာ အမြဲပျော်မွေ့နေသူအဖြစ် ရှင်သန်နိုင်ပါစေ။
    ကဗျာလေး အရမ်းကောင်းပါသည်။
    ခင်မင်လျက်
    အမသဒ္ဓါ

    ReplyDelete
  2. ကဗျာကောင်းလေးတစ်ပုဒ်ဖတ်သွားတယ် လက်ဝဲရေ။
    ကဗျာချစ်သူတွေအဖို့စားလည်းဒီစိတ်အိပ်လည်းဒီစိတ်ဆိုတာ
    ကဗျာထဲကလိုပေါ့နော်း)
    စိတ်ဓာတ်အစဉ်ကြည်လင်အေးမြပါစေကွယ်။

    မေတ္တာဖြင့်
    အန်တီတင့်

    ReplyDelete
  3. လိုက်လို့ကို မမီတော့ဘူးအစ်ကို. သုံးလေးခေါက်ပြန်ဖတ်ရတယ်..။
    ကောင်းလှချည်လားအစ်ကို..။

    ReplyDelete
  4. တော်လိုက်တာ ကဗျာနေ့အတွက် ကဗျာလှလှလေးတစ်ပုဒ်နဲ့ အမှတ်တရ မှတ်ကျောက်တင်နိုင်တယ် ကိုယ့်နှလုံးသားနဲ့အရင်းတည်ထားတဲ့ အရာပဲ..။

    ခင်တဲ့
    မိုးငွေ့

    ReplyDelete
  5. ကဗျာတွေကိုခင်းပြီး ပထ၀ီကိုနမ်းတဲ့ ကဗျာ
    ဖတ်ကောင်းလိုက်တာ

    ReplyDelete
  6. ဒီလိုလေး ကဗျာကို အနားကွပ်ပေးထားတာလှတယ်။

    မာနတွေ အတ္တတွေ ဆိုတာ
    ကဗျာစိတ်နဲ့ပဲ.. ဆုံးပါးသွားခဲ့တာ..
    ကြာ ပေါ့ လေ.

    ReplyDelete